TIRANË, 2 Mars /ATSH/- Turizëm dimëror në fshatin Nivicë të Kurveleshit. Pas grupit të vogël nga Suedia me operatorë turistik, sezoni për vitin 2018 në Nivicë të Kurveleshit tashmë quhet i nisur.
Grupi i parë turistik prej 14 alpinistësh të rinj nga Republika Çeke dhe Sllovakia përzgjodhën Nivicën si vendin e stacionimit të tyre për ngjitje alpinistike.
Prej mëse dy ditësh të rinjtë kanë eksploruar Kanionet e Nivicës, Malin e Këndrevicës, vendin e Lisave të Shenjtë, si dhe kanë ecur përgjatë intenerarit të pregatitur drejt bregdetit të Borshit.
Përveç kënaqësisë për të pasur turistë edhe në këtë kohë plot borë, një aspekt shumë i rëndësishëm i këtij projekti është impakti ekonomik.
14 turistët fjetën 2 ditë në shtëpitë pritëse, ku kishin të prenotuar ushqimin si dhe guidat në destinacionet e vizitueshme.
Kjo konsiderohet një ndihmë e madhe ekonomike për këto komunitete që nuk kanë asnjë mënyre tjetër për të gjeneruar të ardhura.
“Turizmi i integruar me bujqësinë dhe kulturën tradicionale do të jetë rimëkëmbja e zonës së Kurveleshit”, thotë Auron Tare, Drejtor i Agjencisë Kombëtare të Bregdetit, që ndoqi nga afër këtë guidë turistike.
/m.m/
